בראשית ברא אלוהים, את השמים, ואת הארץ. והארץ, הייתה תהו ובהו, וחשך, על-פני תהום; ורוח אלוהים, מרחפת על-פני המים. ויאמר אלוהים, יהי אור; ויהי-אור. וירא אלוהים את-האור, כי-טוב; ויבדל אלוהים, בין האור ובין החשך. ויקרא אלוהים לאור יום, ולחשך קרא לילה; ויהי-ערב ויהי-בקר, יום אחד. ויאמר אלוהים, יהי רקיע בתוך המים, ויהי מבדיל, בין מים למים. ויעש אלוהים, את-הרקיע, ויבדל בין המים אשר מתחת לרקיע, ובין המים אשר מעל לרקיע; ויהי-כן. ויקרא אלוהים לרקיע, שמים; ויהי-ערב ויהי-בקר, יום שני. ויאמר אלוהים, יקוו המים מתחת השמים אל-מקום אחד, ותיראה, היבשה; ויהי-כן. ויקרא אלוהים ליבשה ארץ, ולמקווה המים קרא ימים; וירא אלוהים, כי-טוב. ויאמר אלוהים, תדשא הארץ דשא עשב מזריע זרע, עץ פרי עשה פרי למינו, אשר זרעו-בו על-הארץ; ויהי-כן. ותוצא הארץ דשא עשב מזריע זרע, למינהו, ועץ עשה-פרי אשר זרעו-בו, למינהו וירא אלוהים, כי-טוב. ויהי-ערב ויהי-בקר, יום שלישי.
